Maori

NAU MAI KI TE WHANAKE. WELCOME TO TE WHANAKE. He pukapuka matua, he pukapuka tātaki, he kōpae whakarongo, he pukapuka kaiako me tētahi papakupu a Te Whanake hei ako, hei whakaako hoki i te reo Māori. He huarahi anō hoki tēnei paetukutuku ki ētahi atu rauemi ipurangi mā te tangata anō e mahi ki te kāinga, ki wāhi kē rānei. Hei tautoko ēnei rauemi ipurangi i ngā pukapuka mātua me ngā pukapuka tātaki o tēnei whakaakoranga mō te reo.

He Pitopito Kōrero Hou Tō Te Whanake Kāinga »

8 o Whiringa-ā-nuku, 2015 - Kua tāpiritia te taumata tuatoru o te pūmanawa tautono o Te Whanake hei ako i te reo Māori

Kua puta mai te wāhanga tuatoru o te pūmanawa tautono o Te Whanake mō te iPapa me ngā paparorohiko Android, arā Te Māhuri. I puta noa atu ngā wāhanga o Te Kākano me Te Pihinga, ā, kātahi anō ka puta mai te pūmanawa tautono o Te Māhuri.
He ipu te pūmanawa tautono o Te Whanake mō ngā wāhanga e whā. Ka tīkohikohia mai ngā kōrero me ngā mahi o Te Whanake ki te wāhi kotahi, mai i ngā pukapuka matua, i ngā paki waituhi, i ngā rokiroki, i ngā mahi me ngā hōtaka pouaka whakaata o Te Whanake. Kei tēnei pūmanawa tautono te nuinga o ngā rauemi o Te Whanake, ā-pukapuka mai, ā-paetukutuku mai. He mea nui whakaharahara tēnei hei āwhina i ngā ākonga, ahakoa kei tēhea taumata rātou.
Kāore he utu mō te ipu pūmanawa tautono o Te Whanake, engari me hoko ia wāhanga, NZ$19.99 te utu.
iPad App
Android Tablet App

16 o Haratua, 2014 - Te pūmanawa tautono o Te Whanake hei ako i te reo Māori

Kua puta mai te pūmanawa tautono o Te Whanake mō te iPapa me ngā paparorohiko Android. Kei tēnei pūmanawa tautono te nuinga o ngā rauemi o Te Whanake, ā-pukapuka mai, ā-paetukutuku mai, ā, e hāngai pū ana ngā mahi hei ako i te reo ki ia whakamārama, ki ia whakamārama. He mea nui whakaharahara tēnei hei āwhina i ngā ākonga ahakoa kei tēhea taumata rātou. E whā ngā wāhanga o te pūmanawa tautono, ā, kātahi anō te wāhanga tuatahi ka puta mai, arā ko Te Kākano.
He ipu te pūmanawa tautono o Te Whanake mō ngā wāhanga e whā, ā, ko Te Whanake 1 Te Kākano, te mea tuatahi. Ka tīkohikohia mai ngā kōrero me ngā mahi o Te Whanake ki te wāhi kotahi, mai i ngā pukapuka matua, i ngā pukapuka tātaki, i ngā paki waituhi, i ngā rokiroki, i ngā mahi me ngā hōtaka pouaka whakaata o Te Whanake.
Kāore he utu mō te ipu pūmanawa tautono o Te Whanake, ā, ka taea ētahi o ngā korero me ngā mahi te kite, ā, ka taea anō hoki e te tangata te hoko te katoa o Te Kākano. I whakarewaina a Te Kākano i te 8 o Haratua i tēnei tau. Ā tōna wā puta mai ai ngā wāhanga e toru kei te toe.
iPad App
Android Tablet App

28 o Hune 2013 - Kua whakahoutia te papakupu ā-ipurangi Māori

Kua whakahoutia te paetukutuku o te papakupu Māori, o Te Aka. Kāore i ārikarika ngā kupu matua hou, ngā tikanga hou o ngā kupu, ngā tauira rerenga kōrero me ngā whakapākehātanga kua tāpirihia i ngā tau e rua kua hipa. Kei te haere tonu tēnei mahi. Tērā pea 15,000 ngā kupu matua o te papakupu nei ināianei. He rārangi tikanga o te nuinga o ngā kupu matua.
Kei te piki haere te tatau o ngā toronga ki te paetukutuku nei, ā, e tata ana ki te rua miriona i te tau ināianei.
Kia mōhio mai koutou ki ētahi o ngā āhuatanga o te paetukutuku nei, whakamātauhia ētahi o ēnei kupu: kākariki (kakariki rānei), pūkeko (pukeko rānei), Huirangi, mana, musical instruments, mamaku, taimaha, tairanga, tītaha, tāwhana.
www.maoridictionary.co.nz

28 o Hune 2013 - Kua whakahoutia ngā pūmanawa tautono e kīia nei ko Te Reo Māori

Kua whakahoutia anō hoki ngā pūmanawa tautono, e kīia nei ko Te Reo Māori, mō ngā waea pūkoro, mō te iPapa me ērā momo tarutaru, kia ōrite ai te āhua o te paetukutuku me ngā pūmanawa tautono nei. Ākuanei puta mai ai te whakahoutanga o te pūmanawa tautono mō ngā waea pūkoro Android. Kei te hangaia he pūmanawa tautono mō Microsoft Windows.
iPhone/iPad App
Android App

26 o Mahuru 2011 – Kua puta mai tētahi pukapuka hou mō ngā kupu whakawhiti o te reo Māori

He maha ngā kupu o te reo Māori o tēnei wā i takea mai i ētahi atu reo. Neke atu i te 3,000 ngā kupu pēnei kei roto i tēnei papakupu hou. Kāore ētahi o ngā kupu o te papakupu nei kei roto i ētahi atu papakupu Māori. He kōrero kei te tīmatanga o te pukapuka nei e āta whakamārama ana i te āhua o ngā kupu whakawhiti nei. Kei te mutunga o te papakupu nei he rārangi kupu Pākehā kia mōhio ai te tangata ki ngā kupu Māori o te pukapuka nei e ōrite ana ngā tikanga.

3 o Here-turi-kōkā 2011 - Hokona te rauemi mō ngā waea pūkoro Android

Ka taea te papakupu reo Māori mō ngā waea pūkoro Android te hoko. Ko Te Reo Māori te ingoa o tēnei rauemi.

3 o Here-turi-kōkā 2011 - Kua tae mai te putanga hou o te papakupu, o Te Aka

He maha ake ngā kupu Māori me ngā tikanga o aua kupu matua o te putanga tuatoru nei. Neke atu i te 13,000 ngā kupu matua Māori o te putanga hou nei, ā 16,000 ngā tikanga o aua kupu o te wāhanga Māori-English. Tata tonu ki te 6,000 ngā tikanga hou o te mea hou nei. Neke atu i te 18,000 ngā kupu matua reo Pākehā o te wāhanga English-Māori, arā 5,000 pea ngā mea hou o tēnei putanga.

17 o Pipiri 2010 – He papakupu reo Māori mō te iPhone me te iPod Touch

Ka taea te papakupu reo Māori mō te iPhone me te iPod Touch te hoko. Ko Te Reo Māori te ingoa. Mā tēnei rauemi ka taea ngā kupu o te papakupu nei te kimi ahakoa kei hea, ā, kāore he hononga ki te ipurangi mō tēnei papakupu. Kāore i te tino rerekē tēnei momo papakupu i te papakupu o Te Aka kei te paetukutuku.
http://itunes.apple.com/nz/app/id377136638?mt=8

7 o Pipiri 2010 – Kua whakawhiwhia a John Moorfield ki te QSO

Kia mataara – Kua whakawhiwhia a John Moorfield ki te QSO mō āna mahi mō te whakaako i te reo Māori. I whakaingoatia ia ki tēnei hōnore i te rā whānau o te Kuīni i tēnei tau. Kua roa a Murumāra e whakatairanga i te reo. He mihi tēnei nā mātou, nā ngā kaimahi o Te Whanake.

14 Haratua 2010 – Neke atu i te 100,000 ngā manuhiri

Neke atu i te 100,000 ngā tāngata i kuhu mai ai ki te kimi kupu, tikanga rānei i te papakupu ipurangi o Te Aka i te marama mai i te 13 o Āperira ki te 13 o Haratua. Kātahi anō tēnei taumata ka ekea e tēnei paetukutuku mō te kotahi marama. E whakaata mai ana tēnei tatau i te piki haere o ngā tāngata e hiahia ana ki te kimi kupu, tikanga rānei i tēnei papakupu mai i te tīmatanga i te marama o Tīhema o te tau 2006.
www.maoridictionary.co.nz

2 o Haratua 2010 - He paetukutuku papakupu Māori mō te waea pūkoro

Kua hangaia tētahi paetukutuku mō te waea pūkoro me ngā taru pāoho pakupaku kia tirohia te papakupu o Te Aka. Mehemea ka taea e koe te ipurangi te hono atu ki tō waea pūkoro ka whiriwhirihia e te waea pukoro tēnei mea hou. Rapua ēnei hei tauira: penguin, albatross, waekura, Wharehuia, mana.
www.maoridictionary.co.nz

2 o Whiringa-ā-rangi 2009 - Te Kohikohinga Kupu Whakawhiti o Mua

Ka taea e koe ngā kupu whakawhiti o mua te kimi i roto i te papakupu, i Te Aka, ināianei. Neke atu i te 18,000 ngā kupu whakawhiti o tēnei kohikohinga mai i ngā niupepa reo Māori, i te Paipera Tapu me ētahi atu pukapuka. I tāia ēnei mai i te tau 1842 ki te tau 1952. He maha kei te kōrerotia i ēnei rā, nō reira kei roto hoki aua kupu i te papakupu matua o Te Aka.

8 o Haratua 2009 - Tōku Reo

Kua tīmataria e Whakaata Māori te whakaatu anō i ngā whakaaturanga o Tōku Reo kei tana paetukutuku. Ka taea ēnei te kite kei www.maoritelevision.com Nō reira, mehemea kāore koe i kite i tētahi whakaaturanga, ka taea te kite i ngā wiki e rua ā muri i te rā i whakaaturia ai. Ka taea anō hoki te kite i tētahi whakaaturanga i Whakaata Māori i te rā i muri mai i te rā i whakaaturia tuatahitia ai i te 3 o ngā hāora i te ahiahi.

18 Poutū-te-rangi 2009 - Tōku Reo

Ā te 31 o Poutū-te-rangi, arā o tēnei marama, ka tīmata te whakaaturanga hou e kīa nei ko Tōku Reo ia pō, ia pō o te wiki mai i te Tūrei ki te Rāhoroi. Ka whakapāohohia e Whakaata Māori i te 8 o ngā hāora i te pō. Nā Quintin Hita rāua ko Te O Kahurangi Waaka o Kura Productions ngā whakaaturanga i hanga. E hāngai pū ana ngā kōrero o ia whakaaturanga ki te pukapuka hei ako i te reo Māori e kīa nei ko Te Whanake 1 Te Kākano.

Kotahi rau ngā whakaaturanga kua oti kē, ā, ko Raimona Peni rāua ko Raukura Huata ngā kaiwhakataki e whakaako ana. E hāngai ana ngā kupu hou o ngā whakaaturanga mō te wiki ki te kaupapa kotahi. He mahi ngahau hei āwhina i te ākonga ki te ako i ngā kōrero hou kua whakaakona, ā, he paetukutuku, he rokiroki (arā he kōnae ipurangi), he wānanga me ētahi mahi hoki hei āwhina i te ākonga.

Mā ngā tāngata katoa e hiahia ana ki te tīmata ki te ako i te reo ēnei whakaaturanga o Tōku Reo, Māori mai, Pākehā mai, tamariki mai, pakeke mai.

16 Poutū-te-rangi 2009 - Te Paetukutuku mō Te Ipukarea

I tīmata a Te Ipukarea i te marama o Hūrae i tērā tau, arā i te tau 2008. Kei te paetukutuku mō Te Ipukarea ngā whakamahuki mō Te Ipukarea, mō ngā tāngata o Te Whakaruruhau me ngā kaimahi o Te Ipukarea, tae atu hoki ki ngā kaupapa e mahia ana i tēnei wā. He rite tonu te whakahou i te paetukutuku nei.

13 Poutū-te-rangi 2009 - Te Whanake Pouaka Whakaata

Kua roa te wā e kimihia ana te huarahi kia taea e mātou ētahi whakaaturanga mō te pouaka whakaata te whakapāoho, ā, inā noa nei i tutuki taua wawata. I hangaia aua whakaaturanga hei āwhina i ngā ākonga o te reo Māori mai i te tau 1996 ki te tau 1998, ā, kei te paetukutuku e kīa nei ko Te Whanake Pouaka Whakaata aua whakaaturanga. Kua tāpirihia i te taha o ia whakaaturanga ētahi mahi hei ako i te pūkenga whakarongo ki te reo Māori.

13 Poutū-te-rangi 2009 - Kua whakahouhia ngā rokiroki, ā, kua tāpirihia ngā kōnae

Kei te whakahouhia ngā rokiroki mō te paetukutuku o Te Whanake, ā, kua oti ngā rokiroki mō Te Kākano. Ka āhei te tangata ki te tuku mai i ngā rokiroki kia taea te ako mā te rorohiko, mā ngā momo taru paoho hoki.

Ka taea ngā rīpene whakaata katoa o Te Māhuri me Te Kōhure te mātakitaki mai kei te paetukutuku nei, ā, kua kore he utu ināianei.

13 Poutū-te-rangi 2009 - He mea hou nō Te Aka

Kua tāpirihia ngā tangi o ngā manu māori me ētahi manu kua haria mai ki Aotearoa nei ki te papakupu kei te ipurangi, arā ki Te Aka. Ki te pāwhiritia te āhua o te kāmera, o te tohu whakarongo rānei kei te mutunga o te whakamārama mō tētahi manu, ka rongo koe i te tangi o taua manu. Whakamātauria ētahi o ēnei: korimako, tūī, kawau paka, kōkako, warou, chaffinch, wrybill.

He mea hou anō nō te papakupu nei. Ka taea ngā tūmahi (arā ngā kupu mahi) kua tāpirihia te pīmuri whakahāngū (arā ngā kūmuri hāngū) te kimi. Whakamātauria ēnei hei tauira: rangona, tirohia, inumia and whakarērea.

15 o Hakihea 2008

Kua hangaia he paetukutuku hou mō ngā hōtaka e rua, ā, ko Te Whanake Pouaka Whakaata te ingoa. Tekau mā toru ngā whakaaturanga o ia hōtaka. Hei hoa ēnei mō ngā pukapuka me ngā rauemi o Te Whanake hei ako i te reo Māori. Tekau mā rua meneti pea te roa o ia wāhanga o te pūrākau o ngā hōtaka e rua. He whakamārama i ētahi āhuatanga o te reo me ngā tikanga te toenga o ia whakaaturanga, o ia whakaaturanga. I hangaia ēnei whakaaturanga mō ngā akoranga tauhōkai reo Māori o te whare wānanga hei kīnaki mō ngā rauemi o Te Whanake kia whakaaturia i te pouaka whakaata. Kua hangaia tēnei paetukutuku kore utu hei āwhina i ngā ākonga katoa o te reo Māori, he hua nō ēnei whakaaturanga hei whakapakari i ngā pūkenga whakarongo. Kua tāpirihia ētahi mahi ki ia wāhanga o ngā pūrākau hei āwhina i te akonga o te reo kia puta mai he painga i te mātakitaki me te whakarongo ki ngā kōrerorero o ngā whakaaturanga.

1 o Here-turi-kōkā 2008

I whakamānutia te paetukutuku mō ngā rokiroki o Te Whanake i te Tāite, te 24 o Hūrae i te Kaunuku o Aotea i Tāmaki-makau-rau.

Mā tēnei paetukutuku hou ngā mahi whakarongo me ngā mahi kōrero o ngā pukapuka matua e whā, o ngā rīpene whakarongo me ngā kōpae whakarongo o Te Whanake te whakaoti. Ka taea anō hoki ngā rokiroki te tuku mai ki te rorohiko mā iTunes kia āhei ai te tāpiri atu ki ngā taru paoho, pēnā i te iPod me te iPhone. Nō konā ka āhei koe ki te mahi ahakoa kei hea - kei runga pahi, kei tātahi, kei Waikīkī rānei.

He maha ngā painga o te whakawhiti o ngā rīpene whakarongo me ngā rīpene whakaata ki te ipurangi hei āwhina i ngā ākonga, i ngā kaiako me ngā whakanōhanga e whakaako ana i te reo Māori, arā

  • Ka taea e ngā ākonga ngā mahi te whakaoti i te ipurangi, ā, kāore he utu.
  • Mehemea he hopuoro ā ngā ākonga e honoa ana ki ā rātou rorohiko, ka taea e rātou ngā whakautu te hopu, ka tuku ai ki ō rātou kaiako mā te ipurangi kia tere ai te māka me te tohutohu. Ka taea ā rātou mahi te tuku mā te ipurangi ahakoa kei hea rātou i te Ao.
  • Mehemea he hopuoro a ngā kaiako e honoa ana ki ā rātou rorohiko, ka taea e rātou ngā mahi a ngā ākonga te māka me te tohutohu, ka tuku ai ki ngā ākonga mā te ipurangi, ahakoa kei hea rātou i te Ao.
  • Nō reira, ka taea ngā whakawaiwai reo te whakakore hei ako i te reo Māori.

He āhuatanga nui whakaharahara tēnei mō te ako me te whakaako i te reo Māori.

Mehemea kei te ako koe i te reo Māori he āwhina ēnei mahi i a koe ki te ako i ngā kōrerorero, i ngā kupu hou me nga momo whakatakotoranga kupu o ia wāhanga.

Ā taihoa ake nei tāpiritia ai ngā mahi o ngā rīpene whakaata, whakapaitia ai anō hoki ētahi o ngā mahi.

Nā ngā kaimahi me ngā ākonga o Te Ara Poutama o Te Wānanga Aronui o Tāmaki Makau Rau me VO2 Studio i hanga ngā rokoroki o Te Whanake.

Ka taea ngā rokoroki o Te Whanake te uru atu mā te whārangi matua o Te Whanake kei http://www.tewhanake.maori.nz.

10 o Pipiri 2008

Kua tāpirihia tētahi wāhanga hou ki te paetukutuku mō Ngā Paki Waituhi o Te Whanake. Mā te pāwhiri i te Ako Tatau kei te rārangi tono kei runga o taua paetukutuku, ka taea ngā nama Māori te ako, tae atu ki ngā nama waea, ki ngā tau me ngā moni. He mahi mō te ako tūmataiti ēnei momo whakamātautau.

31 o Poutū-te-rangi 2008

Kua whakahoutia te paetukutuku mō ngā kōwae o ngā paki waituhi me ngā mahi hei hoa mō ngā pukapuka matua o Te Whanake hei ako i te reo Māori. Ko Te Whanake Animations te ingoa o taua pae tukutuku ināianei. Ka taea te uru atu mā tēnei whārangi. Tekau mā rima ngā kōwae i tēnei wā, ā, he kīnaki ēnei mō te pukapuka matua tuatahi o Te Whanake, arā, mō Te Kākano. He kiriata paki waituhi me ngā mahi hei ako i ngā kupu hou me ngā whakatakotoranga kōrero hou ō ia kōwae, ō ia kōwae. Kua hangaia tēnei pae tukutuku mō te ako tūmataiti, ā, kāore he utu.

17 o Kohi-tātea 2008

He wānanga hou kei te ipurangi kia taea ai tātou te matapaki ngā take reo Māori, hei tautoko anō hoki i ngā pukapuka me ngā rauemi o Te Whanake. He tono tēnei ki a koutou kia tukuna mai ō koutou nā whakaaro. Anei te huarahi: http://forum.tewhanake.maori.nz Ka taea anō hoki te uru atu mā tēnei whārangi matua o Te Whanake.

11 o Kohi-tātea 2008

Kua whakahouhia te paetukutuku papakupu Māori. He ātaahua ake te āhua, ā, he tere ake, he hāngai ake ngā kupu ka whakaaturia.

4 o Kohi-tātea 2008

Kei te whakahouhia ngā paetukutuku mō Te Whanake, ā, kei te āpitiria hoki ētahi mea hou. Ko te whāinga kia whānui ngā rauemi hei āwhina i ngā tāngata e ako ana i te reo Māori, ahakoa kei tēhea taumata te ākonga, he ihupuku, he matatau rānei. Kua oti kē te paetukutuku mō ngā rauemi o Te Whanake te whakahou, ā, ka taea ngā rauemi te tono mai ki te reo Māori.

3 o Haratua 2007

He toa kei te paetukutuku mō Te Whanake i nāianei hei hoko i ngā rauemi o Te Whanake. Ka taea ngā rauemi katoa o Te Whanake te hoko i nāianei, ahakoa kei hea te tangata e noho ana i te ao. Haere ki te Toa o te paetukutuku o Te Whanake ki te hoko i tētahi rauemi, i ētahi rauemi rānei.

7 o Poutū-te-rangi 2007

Tokomaha ngā tāngata e toro atu ana ki te papakupu Māori, ki Te Aka, kei te ipurangi mai i te marama o Tīhema. 15000 ngā rapunga kupu i ia wiki, i ia wiki mō ngā wiki kua hipa. Kei te whakamihia te ngāwari o te whakahaere me te whānui o ngā whakamāhuki mā ngā ākonga o te reo, tae atu hoki ki ngā whakamārama o ngā āhuatanga Māori. Whakamātauria kei te paetukutuku: www.maoridictionary.co.nz