Te Papakupu

Te Aka Maori-English, English-Maori Dictionary and Index

Kua whiriwhirihia ngā kupu o te reo Māori o ēnei rā mō tēnei papakupu Māori hei āwhina i ngā tāngata e ako ana i te reo Māori. Atu i ngā kupu o ētahi atu papakupu o te reo Māori, kei roto i tēnei papakupu:

• ngā kupu me ngā whakamārama mō ngā rākau, mō ngā ngārara, mō ngā ika, mō ngā manu, mō ngā kararehe, mō ngā whetū, mō ngā whetūao me ngā mea o te rangi, mō ngā momo waiata me ngā haka, mō ngā momo taonga pūoro, mō ngā rōpū, mō ngā whenua o te ao me ngā wāhi, mō ngā tāngata rongonui o te ao Māori anō hoki
• he whakamārama mō ngā tikanga e hāngai pū ana ki te ao Māori
• he whakamahuki me ētahi tauira rerenga kōrero mō ngā kupu wetereo
• he whakamārama me ētahi tauira rerenga kōrero mō ngā kīwaha.

Kua kohikohia ēnei momo kupu hei āwhina i te akonga kia matatau ia ki te kōrero i te reo nei.

Ahakoa ka tū motuhake tēneipapakupu, kei konei ngā kupu katoa o ngā pukapuka me ngā rauemi o Te Whanake, ā, he kuputohu anō hoki kia tere ai te kite i ngā kaupapa, i ngā mapi, i ngā whakaahua, i ngā kīwaha, i ngā whakataukī me ngā pepeha, i ngā whakamārama mō ngā momo rerenga kōrero me te wetewete i te reo.

Ngā mea hou o tēnei putanga

Kei te wāhanga Māori-Pākehā 13,000 ngā kupu matua me ngā aronga motuhake 16,000 o tēnei putanga hou, arā, kua tata ki te 6,000 ngā aronga motuhake kua tāpirihia ki tēnei putanga tuatoru. Neke atu i te 18,000 kupu matua o ngā rārangi kupu o te wāhanga Pākehā-Māori, arā e 5,000 ngā mea hou.

Te momo rauemi: Papakupu
Te āhua: He uhi ngohe
Te putanga: Te tuatoru
Ngā whārangi: 468
Te tau i tāia ai tēnei putanga: 2011
Te kaitā: Pearson
ISBN: 978-1-4425-3846-7
Te utu: $54.99 kei roto te tāke hokohoko